|
SubscriptionsSites I Read
|
|
|
|
| 宿命主義
如何調校 相識相愛 的次序
今天碰上 愛上你 便有罪
毫無邪惡 真心的愛 都顧慮
光陰錯過 我與你 沒法追
＊難道 我愛你 你愛我 都不會成事
難道 你愛我 我愛你 要下輩子＊
＃沒法掌握戀愛是個 宿命的主義
我最終 不敢放任至此
在倒數的戀愛是個 生命的諷刺
很可能 天意＃
誰人談到 三者戀愛 的故事
總很介意 更控訴 是錯事
誰明了我 思想爭鬥的對峙
總批判我 錯愛了 沒法子
REPEAT＊＃
深信不可置信 我愛得極痛
我如何難受天不會懂
REPEAT＃ (尼首歌係07年12月果時錄o既! 有人曾經話我放上blog d 歌都係反映當時心情, 講真, 一dd 啦, , 邊得黎生活得咁精彩, 咁多感情曲節播o 不過尼首歌就............我都重記得錄歌時個心情o既! 用一個字黎形容, 正! 唔係指我唱得正, 而係.........woo!) | | |
| 而家一邊聽住新城顏生o既直播電台節目, 一邊打blog, 好好feel , 因為真係好鍾意佢把聲, 好溫柔, 好磁性! 有無人可以為左一把聲, 而愛上一個人o既呢?? 記得n 年前亦有一期幾沉迷佢, 每晚定時定候坐定定聽佢講野o 但係為乜之後無再繼續聽呢? 講真, 唔記得左lu ! 哈! 搵到尼段片, 三個都好勁! | | |
| 本來生活平平淡淡咁, 都無乜特別野可以寫, 之不過岩岩追完套韓劇"不要獶豫", 又真係好鬼好鬼死好睇, 最鍾意煲d 愛情劇, 無法啦! 鬼叫我果段愛情已經歷時廿幾年, 無乜新意嘛! 惟有外求囉! 但係現實又唔可以真係發生, 所以借d 劇集黎感同身受吓, 吊吓癮都好呀! 富貴門終於都大結局, 還得神落o 聽哂全套劇(真係靠聽, 因為o係另一間房一路打機, 一路聽住), 唔駛再心火盛啦! 本來宣傳時見三嫂由肥師奶瘦身成功, 變番靚靚師奶, 心諗尼獲吐氣揚眉啦! 三哥咪以為得你自己重好索溝到女, 三嫂都重風韻尢存, 飲得杯落架! 再加上一個唔識老o既呂良偉, 應該係有睇頭o既, 點知睇左第一集, 就唔想哂時間坐定定睇, 後尾連聽都其實唔想聽, 因為個劇情太唔合理嘛! 尢其聽到亞撈家話, 佢要攞番佢應得o既野, 痴痴地架! 佢只係一個以行騙為生o既人, 同佢地都無血綠關係, 有乜野係佢應得架?? 超唔合理囉! 即係好似我地尼庭窮苦人家出身o既, 係咪應該眼紅d 有錢佬, 覺得佢地o既錢應該分d 比我呢?? 白痴先可以講出尼句野, 忍命把啦! 另外想批評吓尼套劇o既編劇, 係! 我知打份工做又三十六, 唔做又三十六, 但都唔好懶成咁, 將近年所有富豪發生o既事, 都攞黎變為劇情, 重要發生o係同一間公司度嘛! 黑仔見得多, 有無黑到無情白事將d 保險箱當廢物掉左, 比人綁架弄至有點兒失常, 搞婚外情搞到佢老母話只係當佢叫雞, 更離譜o既係, 連外國一個空殼基金都關佢間公司事? 超人咩, 一吓子發生咁多野, 好似好豐富好有劇味咁, 但其實只係一個字, 抄! 雖然話天下文章一大抄啫, 都抄得好少少呀! 咪Q 係又抄, 唔係又抄嘛! 何況尼d 新聞都耳熟能詳, 駛鬼你再重覆一次咩! 哂Q哂一班復出o既演員囉! 除左比左個機會已婚o既佢地可以同異性錫吓咀仔之外, 尼套劇真係一無事處, 早d完算積番d 陰德, 唔駛搞到我一路聽, 一路魚蝦蟹, 完左真係功德無量, 阿門! | | |
| 黑夜的豹........... 每次聽尼首歌, 都諗番n 年前o係聊天室唱尼首歌o既情境, 超搞笑! 記得之後細妹話佢丈夫都聽到, 重話都唱得ok 喎! 當然我唔會真係相信啦! 都只係客氣說話黎啫! 不過確實幾懷念當年認識o既一班網友架! 因為知道大家都係真心想交朋友, 而唔係一般人所認為, 網上交友係無腦(尢其係香蕉俱樂部幾個主持, 一聽到d 聽眾話個朋友o係係網上識, 幾乎唔想講野, 老早批死左對方一定唔係好人咁! 尼點我強烈反對, 但容後得閒先再發表偉論啦!) 每晚差不多時段都入聊天室, 吹吓水, 偶然唱吓歌仔咁, 一樂也! 不過快樂o既時光總係過得快, 而且娛樂尼樣野, 日日做就變左公式化唔好玩, 所以最後都一個一個咁慢慢消失哂 lu! 講番尼首歌先, 唔知點解每次一聽d 音樂響起, 隻腳總不期然的 un 吓 un吓! 心情都輕鬆起黎! 想聽梅姐原唱就去youtube 搵啦! 下面果首係我翻唱架! 咪話我唔事先聲明喎!  | | |
| 今日又無返工, 做左超過十個鐘o 做到好厭, 唔想再做啦! 大仔曾經講過, 公司唔會有人信我o係屋企真係會做公司野, 我都知, 但係, 重要咩?? 唔想因為驚其他人點睇我, 令自己受做極都做唔哂d野o既壓力, 所以, 其他人甚至老細可能覺得我尼份工好嘆, 由得佢地點諗啦! 若果有一日頂我唔順炒我o既話, 我會覺得其實佢地o既損失一定大過我囉! 雖然我對自己o既辦事能力好有自信, 之但係我都明白, o係老細同d 太子眼中, 每個伙記做野都差不多架啦! 因為根本佢地都無閒情去了解嘛! 好似出發票咁, 甲同乙兩個員工都識得出賬單,咁o係佢地心目中, 兩個人o既存在價值都係一樣架啦! 因為佢地跟本唔知原來亜甲每個月o既出錯, 令公司收少左錢o嘛! 又好似我四月起做埋公司全盤數咁, 我有我去花好多功夫做一盤超真實o既數出黎, 其實佢地都無尼個知識去分辨出有乜唔同囉! 哂鬼氣! 有時我都會嬲自己點解明知求其做又三十六, 認真咁做都係三十六, 重要咁on居居去比心機做o 四年前決定返尼份工, 重好鬼天真咁以為可以一邊做, 一邊炒吓股添! 因為當年認識o既大部份股友, 都係好空閒架! 點鬼知到自己返工,又唔係咁環境喎! 唉! 試過幾多次做到好忟, 想干脆講聲" 唔撈啦!" 可惜今時唔同往日, 以往好少為錢煩惱, 近尼兩年都開始愁啦! 有時甚至會為左錢,有d 嬲老公添! 不過當然都只係o係心裏面嬲幾分鐘, 唔會o係佢面前表現出黎o既! 無必要啦! 暫時我都重頂到, 頂多陣囉! 不過有時都實在頂得幾辛苦架! 其實佢知唔知呢??? 可能我d 演技真係好了得, 所以佢好似完全feel唔到, 其實我已經為幾個臭錢, 煩惱左好耐啦! 月中要交成萬蚊保險費, 月尾又要交兩萬蚊學費, 隨住簿仔d 錢越黎越少, 安全感奕跌破新低點! 惟一o既解決方法, 好似只有搵多份兼職,之但係, 鬼請我咩?? | | |
|
